ទូរទស្សន៍រដ្ឋចិន CCTV បានរាយការណ៍ថា Muifa គឺជាព្យុះស៉ីក្លូនត្រូពិក ដែលមានឥទ្ធិពលខ្លាំងបំផុត គិតចាប់តាំងពីការធ្វើកំណត់ត្រាចាប់ផ្តើមនៅឆ្នាំ១៩៤៩។
ទោះជាយ៉ាងណា ភ្លាមៗនោះនៅមិនទាន់មានសេចក្តីរាយការណ៍ណាមួយអំពីមនុស្សស្លាប់ឬរបួស ដោយគ្រោះធម្មជាតិនេះនៅឡើយទេ។ ប៉ុន្តែមនុស្សយ៉ាងហោចណាស់ចំនួន ៤២៦,០០០នាក់ ក្នុងទីក្រុងសៀងហៃត្រូវបានជម្លៀសទៅកាន់ទីសុវត្ថិភាព ខណៈ ១.២ លាននាក់ ផ្សេងទៀតត្រូវបានបញ្ជូនទៅជម្រកបណ្តោះអាសន្ន នៅក្នុងខេត្ត Zhejiang ដែលស្ថិតនៅជិតទីក្រុងនេះ។
រលកធំៗត្រូវបានគេមើលឃើញថា កំពុងបោកបក់សន្ធាប់មកលើបណ្តោយឆ្នេរនៅជាប់ឈូងសមុទ្រ ហាងចូវ Hangzhou នៅភាគខាងត្បូងទីក្រុងសៀងហៃ ហើយមានគ្រោះបំណាក់ដីត្រូវបានរាយការណ៍ថា កើតឡើងនៅស្រុក Ninghai របស់ខេត្តហ្ស៉ីជាំង។
តាមការព្យាករនៅថ្ងៃព្រហស្បតិ៍នេះ បានចាត់ថ្នាក់ព្យុះទីហ្វុង Muifa ធ្លាក់មកនៅត្រឹមជាព្យុះត្រូពិកខ្លាំងមួយ ប៉ុន្តែវានឹងនាំមកនូវភ្លៀងធ្លាក់ខ្លាំង និងការជន់លិចភ្លាមៗនៅទូទាំងខេត្តមួយចំនួន ខណៈដែលព្យុះនេះបាននិងកំពុងរំកិលទៅភាគខាងជើង ឆ្លងកាត់ខេត្តជាប់ឆ្នេរសមុទ្រ ដែលមានប្រជាជនរស់នៅច្រើន៕