សរសេរនៅលើបណ្ដាញទំនាក់ទំនងសង្គម អ្នកឧកញ៉ា គិត ម៉េង បានលើកឡើងថា នៅពេលជីវិតដុនដាប ហើយអ្នកត្រូវព្យាយាមធ្វើឲ្យវាប្រសើរទ្បើងវិញ ជីវិតហាក់ដូចជាពិបាកខ្លាំងណាស់។ គំនិត និងភាពភ័យខ្លាចថា “តើខ្ញុំត្រូវចាប់ផ្តើមម្តងទៀតដោយរបៀបណា?” អាចបំផ្លាញការតស៊ូរបស់មនុស្សមួយចំនួន នៅពេលពួកគេបានមើលឃើញនូវកិច្ចការដែលពួកគេបានធ្វើអស់មួយជីវិតរបស់ពួកគេរលាយបាត់ និងបែកខ្ញែកខ្ទេចខ្ទី នៅចំពោះមុខពួកគេ។

អ្នកដទៃទៀតយល់ឃើញថា ពិបាកនឹងអត់ឱនឱ្យខ្លួនឯងចំពោះកំហុសមួយចំនួនពីអតីតកាល ដែលរុញច្រានឱ្យពួកគេប្រឈមមុខនឹងបញ្ហានាពេលបច្ចុប្បន្នរបស់ពួកគេ។ យើងដឹងថាជីវិតគឺដូចជាការងារផ្ទះដែលត្រូវធ្វើ។ វាក៏ជាការរត់ប្រណាំង។ វាក៏ជាភ្នំដែលយើងត្រូវឡើង។ វាក៏ជាទន្លេដែលយើងត្រូវហែលឆ្លងកាត់ ហើយវាក៏ជាគោលបំណងដែលយើងត្រូវសម្រេចឲ្យបានផងដែរ។

អ្នកមិនត្រូវឈ្លក់វង្វេងនឹងរឿងមិនសប្បាយចិត្តនោះទេ។ ជាគោលការណ៍ធម្មជាតិ វាជាការពិតដែលយើងជាមនុស្ស គឺពោរពេញដោយអារម្មណ៍ សេចក្តីប៉ងប្រាថ្នា សេចក្តីត្រូវការ និងភាពភ័យខ្លាច។ យើងព្រួយបារម្ភ និងភ័យខ្លាចថាយើងមិនបានធ្វើអ្វីៗបានល្អក្នុងជីវិតរបស់យើង។ នេះគឺជាអតីតកាលរបស់យើងដែលធ្វើឲ្យយើងជឿថាជីវិតគឺពិតជាលំបាកមែន។

យើងត្រូវមើលបញ្ហាប្រឈមជាការសាកល្បងមួយ ដែលនឹងសម្រួចភាពធន់រឹងមាំរបស់យើង។ បុគ្គលជោគជ័យគ្រប់រូបតែងជួបឧបសគ្គ និងបញ្ហាប្រឈម។ ខ្ញុំសង្កេតឃើញថាពួកគេកម្រត្អូញត្អែរអំពីការលំបាកក្នុងផ្លូវជីវិតរបស់ពួកគេណាស់។ ពួកគេដឹងថាពិភពលោកពិតគឺរញ៉េរញ៉ៃ និងមិនអាចទាយទុកជាមុនបានទេ។ ពួកគេដឹងថាភាពរញ៉េរញ៉ៃកំពុងបិទបាំងឱកាស ហើយពួកគេជឿជាក់លើខ្លួនឯងថាមានសមត្ថភាពរកឃើញឱកាសនោះ។ ពួកគេមានទំនោរមើលឃើញបញ្ហាប្រឈមទាំងនោះជាការសាកល្បង ពោលគឺការល្បងមើលមួយដែលនឹងសម្រួចភាពធន់រឹងមាំរបស់ពួកគេ។

អ្នកឧកញ៉ា គិត ម៉េង បានរំលេចថា ប្រសិនបើអ្នកសួរខ្លួនឯងដោយចៃដន្យថា "ហេតុអ្វីបានជាជីវិតខ្ញុំហាក់ដូចជាពិបាកជាងជីវិតអ្នកដទៃ" សូមចងចាំឃ្លាដ៏សាមញ្ញនេះថា «ជីវិតយើងមិនត្រូវបានកំណត់លក្ខណៈដោយបទពិសោធពីមុន ដោយការសម្រេចចិត្តមិនល្អរបស់យើង ឬបរាជ័យរបស់យើងនោះទេ។ នៅពេលដែលយើងផ្តោតលើភាពវិជ្ជមាន នោះជីវិតកាន់តែងាយស្រួល។ នៅពេលយើងផ្ដោតលើអារម្មណ៍ឯកា លើការនៅម្នាក់ឯង ឬលើអ្វីដែលយើងមិនមាន នោះជីវិតគឺពិបាក»៕