សារព័ត៌មាន Reuters នៅថ្ងៃអង្គារ ទី៣០ ខែសីហា ឆ្នាំ២០២២ បានផ្សាយថា រដ្ឋមន្ត្រីក្រសួងផែនការរបស់ប្រទេសប៉ាគីស្ថាន លោក Ahsan Iqbal បានឱ្យដឹងថា តាមការវាយតម្លៃ ជំហានដំបូងអំពីទំហំនៃការខូចខាត ដែលបង្កឡើងដោយមហន្តរាយទឹកជំនន់ដ៏អាក្រក់នាពេលថ្មីៗនេះ គឺមានចំនួនជាង ១០ពាន់លានដុល្លារ ។

លោក Ahsan Iqbal បានបញ្ជាក់យ៉ាងដូច្នេះថា «ខ្ញុំគិតថាវានឹងមានទំហំធំ រហូតមកដល់ពេលនេះ ហើយការប៉ាន់ប្រមាណជាបឋម គឺធំធេងណាស់ ពោលគឺជាង ១០ពាន់លានដុល្លារឯណោះ»។

លោកបន្ថែមថារហូតមកដល់ពេលនេះ មានមនុស្សជាង ១,០០០នាក់ហើយបានស្លាប់ រីឯ ការខូចខាតផ្ទះមានជិតមួយលានខ្នង។ លោក Ahsan Iqbal បានវាយតម្លៃវាយថាទឹកជំនន់នាពេលថ្មីៗនេះ មានសភាពអាក្រក់ជាងទឹកជំនន់ដែលបានវាយប្រហារប្រទេសប៉ាគីស្ថាន កាលពីឆ្នាំ២០២០ ដែលនៅកាលនោះ អង្គការសហប្រជាជាតិ បានចាត់ទុកថាជាគ្រោះមហន្តរាយដ៏ធំបំផុតមិនធ្លាប់មាន។

បើតាមរដ្ឋមន្ត្រីប៉ាគីស្ថានរូបនេះ វាអាចចំណាយពេល ៥ឆ្នាំដើម្បីកសាង និងស្តារប្រទេសជាតិឡើងវិញ ហើយក្នុងរយៈពេលដ៏ខ្លីខាងមុខនេះ ប្រជាជនប៉ាគីស្ថានអាចនឹងប្រឈមមុខនឹងការខ្វះខាតស្បៀងអាហារ ធ្ងន់ធ្ងរ។

ទឹកជំនន់ភ្លាមៗដែលមិនធ្លាប់មានពីមុនមក បានបំផ្លាញផ្លូវ ថ្នល់ ដំណាំ ហេដ្ឋារចនាសម្ព័ន្ធ និងស្ពាន ហើយសម្លាប់មនុស្សជាង ១,០០០នាក់ ក្នុងរយៈពេលប៉ុន្មានសប្តាហ៍ថ្មីៗនេះ ព្រមទាំងបង្កផលប៉ះពាល់ដល់ប្រជាជនជាង ៣៣លាននាក់ ឬស្មើនឹង ១៥% នៃចំនួនប្រជាជន ២២០លាននាក់ នៃប្រទេសប៉ាគីស្ថាន៕