ក្នុងឱកាសអញ្ជើញជាអធិបតីភាពដ៏ខ្ពង់ខ្ពស់ក្នុងពិធីសម្ពោធដាក់ឱ្យប្រើប្រាស់ជាផ្លូវការ «មន្ទីរពេទ្យ ហ្លួង ម៉ែ» នៅថ្ងៃទី១៦ ខែកញ្ញា ឆ្នាំ២០២៦ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជាមានប្រសាសន៍ថា រឿងបញ្ហាបូរណភាពទឹកដីកម្ពុជាសម្តេចមិនដែលព្រងើយកន្តើយនោះទេ តែងតែយកចិត្តទុកដាក់ស្នើឱ្យសហគមន៍អន្តរជាតិអន្តរាគមន៍គ្រប់ពេលវេលាទាំងនៅក្នុងវេទិកាជាតិនិងអន្តរជាតិ ។

សម្តេចធិបតីមានប្រសាសន៍ថា ជាក់ស្តែងករណីវីរៈកងទ័ពកម្ពុជាទាំង១៨រូបដែលត្រូវយោធាថៃចាប់ខ្លួនអស់រយៈពេលជាង១០០ថ្ងៃនាពេលកន្លងមកនោះ បានប្រើវិធីសាស្រ្តដោះស្រាយរហូតដល់មានលទ្ធភាពល្អដែលភាគីថៃបានដោះលែងមកវិញដោយជោគជ័យ។

សម្ដេចធិបតី សូមឱ្យប្រជាពលរដ្ឋបន្តជឿទុកចិត្តលើរាជរដ្ឋាភិបាលដោះស្រាយរឿងបញ្ហាទឹកដីរបស់យើងដោយសន្តិវិធីប្រើតាមច្បាប់តទៅទៀត យើងប្រើពេលយូរតែយើងមិនបានភ្លេចទេ រាល់ការធ្វើ យើងធ្វើការតវ៉ា ឥឡូវនេះUNCLOS យើងប្តឹងទៅអង្គការសហប្រជាជាតិ”។

ជាមួយនឹងការប្តឹងផ្តល់ទៅអង្គការសហប្រជាជាតិឱ្យជួយផ្សះផ្សាក្រោមអនុសញ្ញាអង្គការសហប្រជាជាតិស្តីពីនីតិសមុទ្រ (UNCLOS)នេះសម្តេចធិបតីនាយករដ្ឋមន្រ្តីសង្កត់ធ្ងន់ថា ក៏មានបុគ្គលមួយចំនួនរិះគន់ ខណៈពេលមិនទាន់ប្តឹងក៏មានការរិះគន់ទៀតថា ប្តឹងគ្មានប្រយោជន៍ ។ ប៉ុន្តែទោះជាមានការលើកឡើងយ៉ាងនេះក្តី គឺរាជរដ្ឋាភិបាបាលខិតខំប្រឹងប្រែគ្រប់មធ្យោបាយទំាងអស់ ដើម្បីការពារអធិបតេយ្យភាព និងបូរណភាពទឹកដីកម្ពុជា៕