លោក ព្រំ បូរ និងក្រុមគ្រួសារបន្តកាន់កាប់ដីដោយខុសច្បាប់នៅក្នុងតំបន់អភិវឌ្ឍន៍ឫស្សីកែវ ភ្នំពេញៈ អភិបាលខណ្ឌឫស្សីកែវ ថ្លែងថា លោក ព្រំ បូរ និងក្រុមគ្រួសារបន្តកាន់កាប់ដីដោយខុសច្បាប់នៅក្នុងតំបន់អភិវឌ្ឍន៍ឫស្សីកែវ ស្ថិតក្នុងភូមិបឹងឈូក សង្កាត់គីឡូម៉ែត្រលេខ៦ ខណ្ឌឫស្សីកែវ ក្រោយអាជ្ញាធរដោះស្រាយបញ្ចប់រួចរាល់ក៏ដោយ។
អភិបាលនៃគណៈអភិបាលខណ្ឌឫស្សីកែវ បានបញ្ជាក់ជាថ្មីម្តងនៅថ្ងៃទី២៨ ខែកក្កដា ឆ្នាំ២០២៦ថា អាជ្ញាធរបានចេញសេចក្តីជូនដំណឹងចំនួន ១៦លេីក ជម្រាបជូនលោក ព្រំ បូរ និងក្រុមគ្រួសារតម្រូវអោយរុះរើសំណង់ឃ្លាំង របងថ្ម និងសម្ភារៈផ្សេងៗចេញពីលើដីស្ថិតក្នុងប្លុកត្រីកោណ នៃតំបន់អភិវឌ្ឍន៍ឫស្សីកែវ ទីតាំងដីគ្រួសារលោក ព្រំ បូរ កំពុងគ្រប់គ្រងកាន់កាប់គឺជាដីរបស់ប្រជាពលរដ្ឋជាច្រេីនគ្រួសារផ្សេងទៀតមានសេចក្ដីសម្រេចពីរដ្ឋបាលរាជធានីភ្នំពេញ តែមិនទាន់បានចូលកាន់កាប់ ។
នៅចំពោះមុខនេះ លោក ព្រំ បូរ និងក្រុមគ្រួសារនៅតែចចេសរឹងរួសមិនគោរពច្បាប់ ខិតខំកៀគរបក្សពួកមកធ្វេីសកម្មភាពប្រឆាំងចំណាត់ការរដ្ឋបាលខណ្ឌឫស្សីកែវដែលបំពេញការងារក្នុងដែនសមត្ថកិច្ច។
ប្រវត្តិការដោះស្រាយបញ្ហាដីធ្លីនៅក្នុងតំបន់អភិវឌ្ឍន៍ឫស្សីកែវ ករណីលោក ព្រំ បូរ គឺអ្នករឹងរួសក្នុងចំណោមអ្នករឹងរួសទាំង៨ ដែលបានធ្វេីសកម្មភាពប្រឆាំងការសម្រេចរបស់អាជ្ញាធរជាតិដោះស្រាយទំនាស់ដីធ្លី និងអាជ្ញាធរដែនដី រហូតដល់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រីនៃព្រះរាជាណាចក្រកម្ពុជា អនុញ្ញាតជាគោលការណ៍អោយមានវិធានការរដ្ឋបាល និងវិធានការច្បាប់ចំពោះអ្នករឹងរួសទាំង៨នាក់នេះ ។
តារយៈលិខិតលេខ ៧៤៦ សជណ.ផក របស់ទីស្តីការគណៈរដ្ឋមន្ត្រី ចុះថ្ងៃទី២៧ ខែមិថុនា ឆ្នាំ២០១៨ បានបញ្ជាក់ច្បាស់ថា ៖ រាជរដ្ឋាភិបាលបានយល់ព្រមអនុញ្ញាតជាគោលការណ៍អោយរដ្ឋបាលរាជធានីភ្នំពេញអនុវត្តវិធានការរដ្ឋបាលចំពោះអ្នករឹងរួសតាមស្មារតីលិខិតលេខ១១៨៨ សជណ ចុះថ្ងៃទី១៤ ខែមិថុនា ឆ្នាំ២០១៣ របស់ទីស្តីការគណៈរដ្ឋមន្ត្រី ដែលមិនព្រមទទួលយកដីឡូតិ៍ដែលអាជ្ញាធរជាតិដោះស្រាយទំនាស់ដីធ្លី ហេីយយកដីដែលពួកគាត់កាន់កាប់លេីសដោយខុសច្បាប់ប្រគល់ជូនប្រជាពលរដ្ឋដែលយល់ព្រមទទួលយកការដោះស្រាយ និងប្រជាពលរដ្ឋដែលមានប័ណ្ណកម្មសិទ្ធតែមិនអាចចូលកាន់កាប់ដីបាន និងដេីម្បីចាត់វិធានការតាមផ្លូវច្បាប់ចំពោះម្ចាស់ក្បាលដីដែលរឹងរួស។ ក្នុងចំណោមអ្នករឹងរួសទាំង៨ ឈ្មោះ មាន ៧ ឈ្មោះបានយល់ព្រមទទួលយកតាមស្មារតីលិខិតលេខ ៧៤៦ សជណ.ផក របស់ទីស្តីការគណៈរដ្ឋមន្ត្រី ចុះថ្ងៃទី២៧ ខែមិថុនា ឆ្នាំ២០១៨ ។
ចំណែកឯឈ្មោះ ព្រំ បូរ ក៏បានទទួលយកដីចំនួន៤ឡូតិ៍ ជាចំណែករបស់ខ្លួននិងក្រុមគ្រួសារតាមសេចក្តីសម្រេចលេខ ០០៧/១៦ សសរ. អជដ ចុះថ្ងៃទី១៤ ខែមិថុនា ឆ្នាំ២០១៦ (ជំហ៊ាន ៣) គឺឡូតិ៍លេខ ៩ ,១១ និងឡូតិ៍លេខ ១៣ ផ្លូវ ៥៩៨ និងឡូតិ៍លេខ ១០ ផ្លូវ ១៧២១ ព្រមទាំងបន្តកាន់កាប់គ្រប់គ្រងដោយខុសច្បាប់លេីចំណែកដីរដ្ឋដែលទុកប្រគល់ជូនប្រជាពលរដ្ឋដែលយល់ព្រមទទួលយកការដោះស្រាយ និងប្រជាពលរដ្ឋដែលមានប័ណ្ណកម្មសិទ្ធតែមិនអាចចូលកាន់កាប់ដីបានរហូតមកដល់បច្ចុប្បន្ននេះ។ អភិបាលខណ្ឌឫស្សីកែវ អះអាងថា ក្រុមគ្រួសារលោក ព្រំ បូរ ដែលបានកាន់កាប់ដីក្នុងតំបន់អភិវឌ្ឍន៍ឫស្សីកែវ ត្រូវបានអាជ្ញាធរជាតិដោះស្រាយទំនាស់ដីធ្លី បានដោះស្រាយបញ្ចប់ដោយបានប្រគល់ដីចំនួន ០៤ឡូតិ៍ តាមរយៈសេចក្តីសម្រេចលេខ ០០៧/១៦ សសរ. អជដ ចុះថ្ងៃទី១៤ ខែមិថុនា ឆ្នាំ២០១៦ (ជំហ៊ាន ៣) គឺឡូតិ៍លេខ ៩ ,១១ និងឡូតិ៍លេខ ១៣ ផ្លូវ ៥៩៨ និងឡូតិ៍លេខ ១០ ផ្លូវ ១៧២១ ជូនក្រុមគ្រួសារលោក ព្រំ បូរ រួចរាល់ហើយ។
នៅក្រោយពេលបានទទួលដីចំនួន០៤ឡូតិ៍ ពីអាជ្ញាធរជាតិដោះស្រាយទំនាស់ដីធ្លី លោក ព្រំ បូរ មិនបានបែងចែកចំណែកអោយសមាជិកគ្រួសារខ្លួនទេ ។
លោកស្រី ព្រំ អូន ជាប្អួនស្រីបង្កេីតលោក ព្រំ បូ រ បានតាមទាដីចំណែករបស់ខ្លួនតាមនីតិវិធីតុលាការពីសាលាដំបូងរាជធានីភ្នំពេញរហូតដល់តុលាកាកំពូល។
តាមអំណាចសាលដីកាលេខ ៣១២(ផ) ចុះថ្ងៃទី៣០ ខែកញ្ញា ឆ្នាំ២០២៥ របស់តុលាការកំពូល បានបែងចែកដីខាងលើសម្រេចបង្គាប់អោយឈ្មោះ ព្រំ បូរ ប្រគល់ដីទំហំ ២០ម៉ែត្រ គុណ ៦០ម៉ែត្រ អោយទៅឈ្មោះ ព្រំ អូន ស្មេីដីចំនួន ២ ឡូតិ៍ ជាក់ស្តែង គឺឡូតិ៍លេខ ១៣ ផ្លូវ ៥៩៨ និងឡូតិ៍លេខ ១០ ផ្លូវ ១៧២១ ព្រមទាំងបានចុះអនុវត្តសាលដីកា ស្ថាពរកាលពីថ្ងៃទី៦ ខែមីនា ឆ្នាំ២០២៦ រួចហេីយ។ មិនត្រឹមតែប៉ុណ្ណោះ លោកស្រី តាំង ហៃថាំង ត្រូវជាម្តាយក្មេករបស់ឈ្មោះ ព្រំ បូរ តាមរយៈលិខិតចុះថ្ងៃទី៦ ខែមេសា ឆ្នាំ២០២៦ ដាក់ជូនមករដ្ឋបាលខណ្ឌឫស្សីកែវ ប្តឹងទប់ស្កាត់ការចុះបញ្ជីធ្វេីប័ណ្ណកម្មសិទ្ធ(ប្លង់រឹង) លេីដីផ្ទះ និងដីចំនួន ៤ឡូតិ៍ ដែលមានឡូតិ៍ លេខ ៩, ១១,១៣ ផ្លូវ១៧១៩ និងឡូតិ៍លេខ១០ ផ្លូវ១៧២១ និងដីផ្ទះ១កន្លែងស្ថិតនៅផ្ទះលេខ១០១៤ ផ្លូវ៥៩៨ ស្ថិតក្នុងភូមិបឹងឈូក សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ ជាបណ្តោះអាសន្នរង់ចាំការដោះស្រាយបែងចែកចំណែកដី និងផ្តល់ដីជូនគាត់សិន។
ក្នុងខ្លឹមសារពាក្យបណ្តឹងរបស់ឈ្មោះ តាំង ហៃ ថាំង បញ្ជាក់ថា “ នៅក្នុងចំណែកដីទាំង ៤ឡូតិ៍ មានចំណែករបស់នាងខ្ញុំ ព្រោះអាជ្ញាធរដកហូតដីរបស់នាងខ្ញុំ ដោយប្រាប់ថាប្រគល់ដី៤ឡូតិ៍ តាមរយៈគ្រួសារឈ្មោះ ព្រំ បូរ ជាអ្នកទទួលរួចហេីយ ដូចមានក្នុងសេចក្តីសម្រេចលេខ ០០៧/១៦ សសរ.អជដ ចុះថ្ងៃទី១៤ ខែមិថុនា ឆ្នាំ២០១៦ ប៉ុន្តែជាក់ស្តែងនាងខ្ញុំពុំទាន់ទទួលបានដីចំណុចណាមួយនៅឡេីយ ហេីយប្រឈមនឹងការរឹបអូសដីរបស់នាងខ្ញុំថែមទៀតផង “៕