សម្ដេចធិបតី បញ្ជាក់ជាថ្មីថា តាំងពីដើមអាណត្តិ រហូតមកដល់ពេលនេះ រដ្ឋាភិបាលអត់មានគម្រោងការកាត់បន្ថយ ឬបង្កើនក្រសួងស្ថាប័ននោះទេ ប៉ុន្ដែអ្វីដែលសំខាន់ គឺយើងប្រកាន់ជំហរ ព្រឹងជាជាងពង្រីក ដោយពង្រឹងស្ថាប័ន ក្រសួងនីមួយៗ តាមរយៈការធ្វើវិភាគមុខងារ និងកែទម្រង់ ទី១ ពង្រឹងរចនាសម្ព័ន្ធ ទី២ពង្រឹងមុខងារ ទី៣ពង្រឹងធនធានមនុស្ស ។ សម្ដេចធិបតី គូសបញ្ជាក់ថា ការពង្រីកក្រសួង ឬបង្រួមក្រសួង ទីមួយមកពីកត្តានយោបាយ ឬទិសដៅនយោបាយ ប្រទេសខ្លះត្រូវបង្រួម ដើម្បីបង្ហាញឆន្ទៈនយោបាយថា គាត់ធ្វើកំណែទម្រង់ ចំណែកប្រទេសពង្រីកដោយសារប្រទេសមានបក្សច្រើនជាដើម។

ប៉ុន្ដែវាមានហេតុផលបច្ចេកទេសជាច្រើនទៀត ដូចជា កាត់បង្រួមខ្លី កាត់បន្ថយការជាន់គ្នា កាត់បន្ថយនីតិវិធី ជួយសន្សំប្រាក់ ជួយសន្សំមន្រ្ដី។ ចំណែកពង្រីក បង្កើននូវជំនាញអាទិភាពសំខាន់មួយចំនួន។ សម្ដេចធិបតី ប្រកាសថា កម្ពុជាមិនចម្លងគោលនយោបាយរបស់ប្រទេសគេនោះទេ មិនមែនប្រទេសវៀតណាមបង្រួមក្រសួង ហើយការកែទម្រង់របស់យើងគឺផ្អែកទៅលើអភិក្រម «ពង្រឹងមិនពង្រីក»។

« អភិក្រមដែលរដ្ឋាភិបាលកម្ពុជាធ្វើការកំណែទម្រង់នៅក្នុងអាណត្តិទី៧នេះ ចំពោះមុខគឺយើងមិនសួរថាតើក្រសួងច្រើនឬតិចទេ។ ម៉ោងស្មើនេះ គឺអត់សួរថាច្រើនឬតិចទេ ព្រោះតាមបទពិសោធន៍ដែលខ្ញុំលើកប៉ុន្មានប្រទេសនោះ គឺខុសគ្នារួចទៅហើយខ្លះបង្កើន ខ្លះបន្ថយ ដូច្នេះយើងអត់សួរទេ។ អ្វីដែលយើងសួរបច្ចុប្បន្ន យើងសួរថា តើក្រសួង ស្ថាប័នដែលមានស្រាប់នេះ រៀបចំបានមានប្រសិទ្ធភាពឬនៅ? ឥឡូវដាក់ទិសដៅកំណែទម្រង់ គឺសួរសំណួរនេះ។ តើគាត់រៀបចំក្រសួងនេះ ធំក្បាល ជើងតូចឬយ៉ាងម៉េច? តើក្រសួងនេះការងារជាន់ជាមួយក្រសួងផ្សេងទៀតឬយ៉ាងម៉េច? តើផ្ទៃក្នុងក្រសួងនោះនាយកដ្ឋាននីមួយៗរៀបចំត្រូវឬនៅ? ឬមួយក៏វាលើសឬខ្វះយ៉ាងម៉េច? នេះគឺជាអភិក្រមរបស់កម្ពុជា»៕