ក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងពិធីអបអរសាទរខួប៣០ឆ្នាំរបស់អង្គការដើម្បីភាពញញឹមនៃកុមារ ហៅកាត់ថា PSE និងប្រគល់សញ្ញាបត្រជូនដល់សិស្ស-និស្សិតជ័យលាភីចំនួន ៥០០នាក់ នៅថ្ងៃទី០២ ខែកក្កដា ឆ្នាំ២០២៦ សម្តេចធិបតី បានគូសបញ្ជាក់ពីតួនាទីដ៏សំខាន់របស់គ្រួសារក្នុងការគាំទ្រការអប់រំរបស់កុមារ និងយុវជន។

សម្តេចធិបតី បន្ថែមថា ប្រសិនបើគ្មានការផ្តល់ឱកាស និងការលះបង់ពីឪពុកម្តាយក្នុងការបញ្ជូនកូនទៅរៀនទេ នោះកុមារនឹងជួបការលំបាកក្នុងការទទួលបានចំណេះដឹង និងអភិវឌ្ឍសមត្ថភាព។ ទោះបីគ្រួសារមួយចំនួនមានជីវភាពប្រឈម ក៏នៅតែខិតខំលះបង់ ដើម្បីផ្តល់ឱកាសឱ្យកូនៗបានសិក្សា និងផ្តោតលើការរៀនសូត្រ។ សម្តេចធិបតី បានបញ្ជាក់ថា មិនថាគ្រួសារមានជីវភាពធូរធារ មធ្យម ឬក្រីក្រ ក៏គ្រួសារនៅតែមានតួនាទីសំខាន់ក្នុងការបង្កើតបរិយាកាសល្អ លើកទឹកចិត្ត និងគាំទ្រដល់ការសិក្សារបស់កូនៗ។

សម្តេចធិបតី បានអំពាវនាវដល់ឪពុកម្តាយ និងអាណាព្យាបាល បន្តផ្តល់ឱកាស និងជួយអប់រំកូនៗនៅក្នុងផ្ទះបន្ថែមទៀត ព្រោះការអប់រំមិនមែនមានតែនៅក្នុងសាលារៀនប៉ុណ្ណោះទេ ប៉ុន្តែត្រូវរួមបញ្ចូលទាំងការអប់រំនៅក្នុងគ្រួសារ និងសហគមន៍ផងដែរ។ សម្តេចធិបតី បានសង្កត់ធ្ងន់ថា ប្រសិនបើសិស្សានុសិស្សខិតខំរៀននៅសាលា ប៉ុន្តែនៅផ្ទះមិនទទួលបានការលើកទឹកចិត្ត ឬមិនមានការផ្តល់តម្លៃចំពោះការសិក្សា នោះអាចធ្វើឱ្យពួកគេប្រឈមនឹងការបោះបង់ការសិក្សា។

សម្តេចធិបតី មានប្រសាសន៍ថា ការចំណាយលើការសិក្សារបស់កូន គឺជាការវិនិយោគរយៈពេលវែង ដែលជួយឱ្យកូនមានសមត្ថភាព ឯករាជ្យក្នុងជីវិត អាចជួយខ្លួនឯង និងជួយគ្រួសារនាពេលអនាគត៕