ប្រាប់អ្នកសារព័ត៌មានក្នុងឱកាសដែលសម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា អនុញ្ញាតឱ្យ លោក អេឡិចសិនដឺ មីខូវស៊ិន (Alexander Micovčin) ឯកអគ្គរដ្ឋទូតថ្មីនៃសាធារណរដ្ឋស្លូវ៉ាគី ប្រចាំនៅកម្ពុជា ចូលជួប និងប្រគល់សារតាំង នៅវិមានសាមគ្គីភាពនៃព្រឹទ្ធសភាជាតិ រាជធានីភ្នំពេញ នាព្រឹកថ្ងៃទី១៩ ខែមីនា ឆ្នាំ២០២៦ លោក ជា ធីរិទ្ធ អ្នកនាំពាក្យព្រឹទ្ធសភា បានឱ្យដឹងថា នៅក្នុងជំនួបនេះ លោក អេឡិចសិនដឺ មីខូវស៊ិន បានជម្រាបជូនសម្ដេចតេជោថា ក្នុងបេសកម្មរបស់ឯកឧត្តមនាពេលនេះ គឺភារកិច្ចការលើកកម្ពស់ទំនាក់ទំនងដ៏ល្អរវាងកម្ពុជា និងស្លូវ៉ាគីដែលមានស្រាប់ឱ្យកាន់តែល្អប្រសើរបន្ថែមទៀត ។

លោកបានសង្កាត់ធ្ងន់ទៅលើទំនាក់ទំនងពាណិជ្ជកម្ម សេដ្ឋកិច្ច និងធុរកិច្ចដែលជាការវិនិយោគនៃចំណុចស្នូលសម្រាប់ការពង្រីកក្នុងអាណត្ដិរបស់ឯកឧត្តម។ ជាការឆ្លើយតប សម្តេចតេជោ បានសម្ដែងការពេញចិត្ដ និងគាំទ្រចំពោះពង្រីកការវិនិយោគ ទំហំពាណិជ្ជកម្ម និងសេដ្ឋកិច្ចរវាងប្រទេសកម្ពុជា និងស្លូវ៉ាគី ក្រៅពីការទូត និងនយោបាយ។

ជាមួយគ្នានេះ សម្តេចតេជោក៏បានកោតសរសើរចំពោះក្រសួងការបរទេសទាំងពីរនាពេលកន្លងមក ដែលរដ្ឋាភិបាលប្រទេសទាំងពីរតែងតែជជែកគ្នា និងគាំទ្រគ្នានៅក្នុងឆាកអន្ដរជាតិផងដែរ៕