កាលពីវេលាម៉ោង ៩:៤៥នាទីព្រឹក ថ្ងៃទី១០ ខែវិច្ឆិកា ឆ្នាំ២០២៥ នៅចំណុចផ្លូវបេតុង នៅភូមិត្រពាំងលេីក សង្កាត់រការធំ ក្រុងច្បារមន ខេត្តកំពង់ស្ពឺ កម្លាំងមូលដ្ឋានកងរាជអាវុធហត្ថក្រុងច្បារមន ដឹកនាំដោយ លោកវរសេនីយ៍ត្រី ធី ឆៃ មេបញ្ជាការ មូលដ្ឋានកងរាជអាវុធហត្ថក្រុងច្បារមន បានឃាត់ខ្លួនជនសង្ស័យ បានចំនួន០១នាក់ មានឈ្មោះ ជុន សៀប ភេទប្រុស អាយុ២៥ឆ្នាំ មុខរបរកម្មកររោងចក្រ ស្នាក់នៅបន្ទប់ជួលលេខ៤ ភូមិត្រពាំងលើក សង្កាត់រកាធំ ក្រុងច្បារមន ខេត្តកំពង់ស្ពឺ ដែលជាប់ពាក់ព័ន្ធករណី គ្រឿងញៀន ។ នៅវេលាម៉ោង ៩:៥៧នាទីព្រឹក (ថ្ងៃ.ខែ.ឆ្នាំដដែល) នៅក្នុងបន្ទប់ជួល ស្ថិតនៅភូមិត្រពាំងលេីក សង្កាត់រការធំ ក្រុងច្បារមន ខេត្តកំពង់ស្ពឺ កម្លាំងមូលដ្ឋានកងរាជអាវុធហត្ថក្រុងច្បារមន ដឹកនាំដោយ លោកវរសេនីយ៍ត្រី ធី ឆៃ មេបញ្ជាការ មូលដ្ឋានកងរាជអាវុធហត្ថក្រុងច្បារមន បានឃាត់ខ្លួនជនសង្ស័យ បានចំនួន១នាក់ទៀត មានឈ្មោះ ជួន លក្ខិណា ភេទស្រី អាយុ២៩ឆ្នាំ មុខរបរមិនពិតប្រាកដ ទីលំនៅបច្ចុប្បន្នភូមិត្រពាំងលេីក សង្កាត់រការធំ ក្រុងច្បារមន ខេត្តកំពង់ស្ពឺ ។
នៅវេលាម៉ោង ១៣:១៧នាទី (ថ្ងៃ.ខែ.ឆ្នាំដដែល) នៅក្នុងភូមិឡ ឃុំព្រៃកាសាំង ស្រុកសាមគ្គីមុនីជ័យ ខេត្តកំពង់ស្ពឺ កម្លាំងការិយាល័យប្រឆាំងគ្រឿងញៀន នៃបញ្ជាការដ្ឋានកងរាជអាវុធហត្ថខេត្តកំពង់ស្ពឺ សហការជាមួយកម្លាំងមូលដ្ឋានកងរាជអាវុធហត្ថក្រុងច្បារមន និងកម្លាំងមូលដ្ឋានកងរាជអាវុធហត្ថស្រុកសាមគ្គីមុនីជ័យ ដឹកនាំដោយ លោកវរសេនីយ៍ត្រី ទឹម សុី នាយការិយាល័យប្រឆាំងគ្រឿងញៀន បានកំណត់មុខសញ្ញា និងបន្តឃាត់ខ្លួនជនសង្ស័យ បានចំនួន១នាក់ទៀត មានឈ្មោះ មាន សុភាព ភេទស្រី អាយុ៤០ឆ្នាំ មុខរបរមិនពិតប្រាកដ ទីលំនៅបច្ចុប្បន្នភូមិឡ ឃុំព្រៃកាសាំង ស្រុកសាមគ្គីមុនីជ័យ ខេត្តកំពង់ស្ពឺ ។
នៅវេលាម៉ោង ១៧:៣៥នាទី (ថ្ងៃ.ខែ.ឆ្នាំដដែល) នៅតាមបណ្តោយផ្លូវលេខ៤១ ត្រង់ចំណុចមុខផ្ទះសំណាក់ យីហោជំនោរភ្នំស្រង់ នៅភូមិស្រង់ ឃុំស្រង់ ស្រុកគងពិសី ខេត្តកំពង់ស្ពឺ កម្លាំងការិយាល័យប្រឆាំងគ្រឿងញៀន នៃបញ្ជាការដ្ឋានកងរាជអាវុធហត្ថខេត្តកំពង់ស្ពឺ សហការជាមួយកម្លាំងមូលដ្ឋានកងរាជអាវុធហត្ថក្រុងច្បារមន និងកម្លាំងមូលដ្ឋានកងរាជអាវុធហត្ថស្រុកគងពិសី ដឹកនាំដោយ លោកវរសេនីយ៍ត្រី ទឹម សុី នាយការិយាល័យប្រឆាំងគ្រឿងញៀន បានកំណត់មុខសញ្ញា និងបន្តឈានដល់ការឃាត់ខ្លួនជនសង្ស័យ ចំនួន០១នាក់បន្ថែមទៀត មានឈ្មោះ ព្រះ សុធូ ភេទប្រុស អាយុ៣៨ឆ្នាំ មុខរបរជាងសំណង់ មានទីលំនៅបច្ចុប្បន្នភូមិត្របែកទូង ឃុំទឹកល្អក់ ស្រុកគងពិសី ខេត្តកំពង់ស្ពឺ ។
ក្នុងប្រតិបត្តិការបង្ក្រាបទាំង៤ទីតាំងផ្សេងៗគ្នានេះ កម្លាំងជំនាញកងរាជអាវុធហត្ថខេត្តកំពង់ស្ពឺ បានឃាត់ខ្លួនជនសង្ស័យ ចំនួន៤នាក់ (ស្រី២នាក់) ព្រមទាំងចាប់យកវត្ថុតាងបានរួមមាន : គ្រឿងញៀនចំនួន៣១កញ្ចប់ ទម្ងន់១៩២.០៩ក្រាម, ជញ្ជីងថ្លឹងគ្រឿងញៀន ចំនួន១គ្រឿង, ថង់ច្រក និងឧបករណ៍ប្រើប្រាស់គ្រឿងញៀនមួយចំនួន, ម៉ូតូ ចំនួន៣គ្រឿង, ទូរស័ព្ទ ចំនួន៤គ្រឿង, លោហ:ធាតុពណ៌លឿងរួមមាន (ខ្សែដៃ ចំនួន០១ខ្សែ កងដៃ ចំនួន៦កង និងខ្សែក ចំនួន២ខ្សែ), អត្តសញ្ញាណប័ណ្ណ ចំនួន១សន្លឹក ។ បច្ចុប្បន្ន ជនសង្ស័យនិងវត្ថុតាង កម្លាំងជំនាញកងរាជអាវុធហត្ថខេត្តកំពង់ស្ពឺ កសាងសំណុំរឿងបញ្ជូនទៅសាលាដំបូងខេត្តកំពង់ស្ពឺ ដើម្បីចាត់ការតាមនីតិវិធី៕