ក្រោយបញ្ចប់កិច្ចជំនួបរវាងសម្តេចតេជោហ៊ុន សែន ប្រធានព្រឹទ្ធសភា និងលោក តាកាហាស៊ី ហ្វូមីអាគី ប្រធានសមាគមជប៉ុន-កម្ពុជានៅព្រឹកថ្ងៃទី១០ ខែវិច្ឆិកា ឆ្នាំ២០២៥ លោក ជា ធីរិទ្ធ អ្នកនាំពាក្យប្រធានព្រឹទ្ធសភា បានឲ្យដឹងថា សម្តេចតេជោបង្ហាញការពេញចិត្តចំពោះក្រុមអ្នកវិនិយោគជប៉ុនប្រមាណជាជិត៤០ក្រុមហ៊ុនចំពោះគម្រោងវិនិយោគលើវិស័យកសិកម្ម និងបច្ចេកវិទ្យានៅកម្ពុជា ។ សម្តេចតេជោបានមានប្រសាសន៍លើកឡើងពីវិស័យកសិឧហ្សាកម្មថា គឺជាចំណុចស្នូលមួយដ៏សំខាន់របស់រាជរដ្ឋាភិបាលកម្ពុជា តាំងពីជំនាន់មុនរហូតដល់បច្ចុប្បន្ន ព្រោះកសិឧស្សាហកម្មជារឿងចាំបាច់និងអាទិភាពបំផុត ។

ចំពោះវិស័យបច្ចេកវិទ្យាវិញសម្តេចតេជោបានគួសបញ្ជាក់ថា រាជរដ្ឋាភិបាលអាណត្តិទី៧ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជាបាននិងកំពុងផ្តោតការយកចិត្តទុកដាក់ក្នុងការអភិវឌ្ឍវិស័យមួយនេះ ខណៈកម្ពុជាកំពុងត្រូវការជាខ្លាំងនៅក្នុងផ្នែកបច្ចេកវិទ្យា ។

សម្តេចតេជោក៏បានលើកឡើងដោយបង្ហាញនូវការពេញចិត្ត ចំពោះអ្វីដែលក្រុមអ្នកវិនិយោគជប៉ុនចាប់អារម្មណ៍ទៅលើកសិឧស្សាហកម្ម និងបច្ចេកវិទ្យា”។

ជាមួយគ្នានេះ សម្តេចតេជោ ហ៊ុន សែន បានជំរុញឲ្យក្រុមអ្នកវិនិយោគរបស់ជប៉ុនចាប់អារម្មណ៍និងពង្រីកអំពីសក្តានុពលនៃវិស័យទាំងពីរនេះឲ្យកាន់តែខ្លាំងក្លាបន្ថែមទៀត ដើម្បីចូលរួមចំណែកជួយលើកស្ទួយសេដ្ឋកិច្ចកម្ពុជា ៕